Gwamnatin Tarayya Ta Kore Ma’aikata 15, Ta Rage Daraja Wasu 59 A Hukumar Gyaran Hali

Matakin Ya Zo Bayan Bincike Mai Zurfi Kan Laifuka Da Rashin Da’a

Abuja – Gwamnatin Tarayya ta yanke shawarar kore ma’aikata 15 na Hukumar Gyaran Hali ta Kasa (NCoS), tare da rage darajar wasu 59, bisa zargin aikata laifuka da rashin bin ka’idoji a wurin aiki.

Sanarwar da Hukumar Kula da Tsarin Fararen Hula, Gyaran Hali, da Shige da Fice (CDCFIB) ta fitar ta nuna cewa an dauki matakin ne bayan bincike mai zurfi kan ayyukan jami’an.

Bayanin Hukuncin

Kakakin hukumar, Umar Abubakar, ya bayyana cewa kwamitin ladabtarwa ya ba da shawarar hukuncin bayan nazari kan laifukan da jami’an suka aikata a sassa daban-daban na kasar.

A cewar Abubakar: “Bayan cikakken bincike, hukumar ta amince da kore ma’aikata 15 saboda manyan laifuka da karya ka’idojin aiki. An kuma rage darajar wasu 59 saboda rashin bin ka’idoji.”

Ya kara da cewa: “An aika wasikun gargadi ga ma’aikata 42 domin su gyara halayensu, yayin da ma’aikata 16 suka wanke kansu daga zarge-zargen da ake musu.”

Dakatarwa da Tuhuma

Sanarwar ta nuna cewa an dakatar da ma’aikata 7 daga aiki yayin da ake ci gaba da binciken wasu laifuka, yayin da wani jami’i kuma an mika shi ga hukumar EFCC domin gurfanar da shi a kotu.

“Ma’aikata 8 an tilasta musu yin ritaya, yayin da aka dawo da jami’i daya kan tsohon matsayinsa, tare da umarnin ya mayar da albashin da ya karba ba bisa ka’ida ba.”

Manufar Gwamnati

Abubakar ya bayyana cewa matakin ya kasance ne domin tabbatar da bin ka’idoji da kuma kiyaye mutuncin hukumar a karkashin jagorancin Ministan Harkokin Cikin Gida, Olubunmi Tunji-Ojo.

“Gwamnati tana nan kan bakinta don tabbatar da cewa duk wanda ya keta ka’idoji za a bi shi da hukunci,” in ji kakakin hukumar.

Daukar Sabbin Ma’aikata

A wani lamari na daban, gwamnatin tarayya ta shirya daukar sabbin ma’aikata 30,000 a hukumomi hudu da ke karkashin ma’aikatar cikin gida, ciki har da hukumar gyaran hali.

An shirya fara daukar ma’aikatan ne a ranar 14 ga Yuli, 2025, bayan an dage shi daga asali ranar 26 ga Yuni saboda wasu dalilai.

Hukumomin da za a dauki ma’aikata a cikinsu sun hada da:

• Hukumar Shige da Fice
• Hukumar Tsaron Fararen Hula (NSCDC)
• Hukumar Kashe Gobara
• Hukumar Gidajen Gyaran Hali

Ana sa ran daukar sabbin ma’aikatan zai taimaka wajen inganta ayyukan hukumomin tsaro da kuma rage yawan rashin aikin yi a kasar.

Full credit to the original publisher: Legit.ng – https://hausa.legit.ng