Fitinannen Uban Daba a Kano, Barga, Ya Fāɗa Kamar Sanda

‘Yan Sandan Kano Sun Kama Mu’azu Barga, Wanda Ake Zargi Da Jagorantar Fashi

Jihar Kano ta samu wani babban nasara a yakin da take yi da masu aikata laifuka, inda ‘yan sandan jihar suka kama wani fitaccen dan daba da ake zargi da jagorantar hare-haren fashi da tashe-tashen hankula a birnin Kano.

An kama Mu’azu Barga tare da wasu mutane 14 a wani gagarumin samame da ‘yan sanda suka kai a wasu unguwanni a cikin birnin Kano, wanda hakan ya kawo karshen wasu ayyukan bata gari da suka dade suna addabar al’umma.

Yadda aka Kama Barga da Abokan Huldarsa

Mai magana da yawun rundunar ‘yan sanda ta jihar Kano, SP Abdullahi Haruna Kiyawa, ne ya tabbatar da kama Barga a wani samame da aka kai a unguwannin Sheka, Ja’oji da Kurna a ranar Asabar, 26 ga Yuli, 2025.

A cewar Kiyawa, kama Barga da sauran mutanen 14 ya kasance cikin shirin Operation Kukan Kura wanda Kwamishinan ‘yan sanda na jihar, CP Ibrahim Adamu Bakori, ya kaddamar domin dakile ayyukan ‘yan daba da masu tayar da hankulan jama’a.

“An kama waɗanda ake zargi da aikata laifin, waɗanda shekarunsu ke tsakanin 14 da 28, da wayoyi huɗu da suka sace daga hannun mutane daban-daban. Sun amsa cewa suna aikata laifuffuka irin su fashi da satar wayoyi.”

Barga Shaharren Dan Daba ne a Kano

Bincike ya nuna cewa Mu’azu Barga wani fitaccen dan daba ne a jihar Kano wanda ke da hannu a hare-haren fashi da kuma tayar da rikice-rikice tsakanin kungiyoyin ‘yan daba a sassan birnin.

A cewar ‘yan sanda, kama Barga ya zama wani muhimmin ci gaba a yakin da ake yi da masu aikata laifuka a jihar, kuma ana sa ran hakan zai rage yawan ayyukan miyagun mutane.

Kwamishinan ‘Yan Sanda Ya Yi Alkawarin Ci Gaba da Yaki da Laifuka

Kwamishinan ‘yan sanda na jihar Kano, CP Ibrahim Adamu Bakori, ya jaddada cewa rundunar za ta ci gaba da yaki da duk wani nau’in laifi a jihar domin tabbatar da zaman lafiya da tsaro.

“Mun ayyana yaki da duk wani nau’in laifi. Rundunar ‘yan sandan Kano za ta ci gaba da tabbatar da zaman lafiya da tsaro a dukkanin fadin jihar.”

Rundunar ta kuma yi godiya ga jama’a saboda hadin kai da suka nuna, inda ta kara rokon su da su ci gaba da bayar da sahihan bayanai domin taimakawa jami’an tsaro wajen gudanar da ayyukansu.

Bayanin Kama Shaharren Dan Daba Baba Beru

A baya, ‘yan sandan Kano sun kashe wani shahararren dan daba mai suna Baba Beru wanda kuma ake zargi da aikata hare-haren fashi da makami a jihar.

Baba Beru ya mutu ne a ranar Talata, 29 ga Yuli, 2025, bayan da ya yi yunkurin kai hari kan wasu jami’an ‘yan sanda da ke gudanar da sintiri a unguwar Gwammaja.

Wani shaidar gani da ido ya bayyana cewa lokacin da jami’an suka nemi kama Baba Beru, sai ya fusata, ya fito da wuƙa cikin hanzari da niyyar kai wa jami’an hari, wanda hakan ya sa suka kashe shi domin tsaron kansu.

Asali: Legit.ng