Gwamnonin Arewa Bakwai Sun Ayyana Hutun Kwana 1 Domin Girmama Marigayi Buhari
Katsina – Kungiyar gwamnonin Arewa maso Yamma ta ayyana ranar Talata, 15 ga Yuli, 2025, a matsayin ranar hutu ta musamman a jihohin bakwai na yankin domin girmama marigayi tsohon shugaban ƙasa, Muhammadu Buhari.
Bayanin Hutun
Sanarwar da shugaban kungiyar kuma gwamnan jihar Katsina, Malam Dikko Umaru Radda ya fitar ta bayyana cewa an ayyana hutun ne domin nuna alhini da baƙin ciki kan rasuwar tsohon shugaban ƙasa.
“Kungiyar Gwamnonin Arewa maso Yamma ta kaɗu da labarin rasuwar tsohon shugaban ƙasarmu, Janar Muhammadu Buhari. Ya rasu ne jiya a wani asibiti da ke Birtaniya,” in ji sanarwar.
Jihohin Da Suka Bada Hutu
Jihohin da suka amince da hutun sun haɗa da:
- Kaduna
- Katsina
- Kano
- Kebbi
- Jigawa
- Sokoto
- Zamfara
Gudummawar Buhari Ga Yankin Arewa
Gwamna Radda ya yaba wa Buhari a matsayin “uba, jagora kuma abin alfahari ga yankin Arewa maso Yamma,” yana mai cewa rayuwarsa cike take da sadaukarwa, gaskiya da amana.
Shirye-shiryen Janyewa
Sanarwar ta ƙara da cewa za a kawo gawar marigayin tsohon shugaban ƙasa zuwa garinsu na haihuwa, wato Katsina, da misalin ƙarfe 12 na rana a ranar Talata.
Kira Ga Al’umma
Kungiyar gwamnonin ta yi kira ga ‘yan Najeriya daga kowane ɓangare su yi wa Buhari addu’ar samun gafara da rahamar Allah SWT.
“Allah (SWT) ya jikansa Ya sanya shi Aljannatul Firdaus, ya kuma ba iyalansa, abokansa da dukan ƴan ƙasa haƙurin jure wannan babban rashi,” in ji Gwamna Radda.
Martani Daga Masu Fada Aji
A wani bangare, Sheikh Aminu Ibrahim Daurawa, babban kwamandan Hisbah na Kano ya roki al’ummar Najeriya su yi wa tsohon shugaban ƙasa addu’ar samun rahama.
Mai wa’azin ya kuma roki ƴan Najeriya da su yafe wa Buhari idan ya masu laifi a tsawon lokacin da ya shafe a kan mulkin Najeriya.
Rahoton Mutane Kan Rasuwar
Tun bayan sanar da rasuwar tsohon shugaban ƙasa, ƴan Najeriya suka fara alhini tare da bayyana ra’ayoyinsu kan halin da aka shiga a shekaru takwas na mulkinsa.
Wasu sun yaba wa Buhari kan yadda ya yi mulki, yayin da wasu ke nuna rashin jin daɗinsu kan wasu shawarwarin da ya yanke a lokacin mulkinsa.
Asali: Legit.ng