Fitattun Jaruman Kannywood Da Suka Yi Suna Amma Rayuwa Ta Juya Musu Waya

A cikin shekaru da suka gabata, masana’antar fina-finan Hausa ta Kannywood ta sami ci gaba mai girma, inda ta haifar da tarin jarumai da jarumai masu hazaka. Sai dai akwai wasu daga cikin wadannan fitattun mutane da suka yi suna da kuma daukaka, amma daga baya rayuwa ta juya musu wuya, har suka zama abin tausayi.

Jaruman Kannywood Da Shahararsu Ta Dushe

Legit.ng ta binciko wasu daga cikin fitattun jaruman Kannywood da suka fuskantar matsalolin rayuwa bayan sun yi fice a masana’antar:

1. Bashir Bala Chiroki: Daga Shahara Zuwa Sayar Da Kunun Aya

Bashir Bala Chiroki na daya daga cikin tsoffin jaruman Kannywood da suka yi fice a shekarun baya. Ya fara aikinsa na fim sama da shekaru 30 da suka wuce, inda ya zama daya daga cikin jaruman da ake kallon su a lokacin.

Sai dai a shekarar 2019, Chiroki ya bayyana halin da yake ciki na rashin taimako daga masana’antar. Ya kai kuka kan yadda daraktoci da furodusoshi suka yi watsi da shi, har ya kai ga sayar da kunun aya don tsira rayuwa.

Wani shafi na Instagram mai suna Northern_hibiscuss ya taimaka masa da kudi sama da N200,000 a watan Janairun 2019. Chiroki ya nuna godiyarsa ga wadanda suka taimake shi, yana mai cewa Allah ya sa tausayi a zuciyoyinsu.

A yanzu haka, Chiroki ya sake samun damar komawa masana’antar, inda yake cikin wasu manyan fina-finai na Kannywood.

2. Ummi Nuhu: Jarumar Da Rashin Lafiya Ta Kawo Ta Kasa

Tsohuwar jarumar fina-finan Hausa, Ummi Nuhu, ta bayyana irin wahalar da ta fuskanta bayan ta daina yin fim saboda rashin lafiya. Ta bayyana cewa ta yi hadari wanda ya kai ga cewa an yi tunanin yanke mata kafa, amma likita ya ki amincewa da hakan.

Ummi ta ce ta yi nadama kan yadda masana’antar ta manta da ita bayan ta daina fim. Ta bayyana cewa ko da yake tana son komawa harkar fim, amma ba a dama mata ba. Ta kara da cewa fim ne abin da ta fi iyawa a rayuwarta, amma yanzu ba ta da damar yin shi.

3. Aminu Mai Dawayya: Mawakin Da Shahararsa Ta Dushe

Fitaccen mawaki, Aminu Lajawa Mai Dawayya, ya kasance daya daga cikin manyan mawakan Kannywood a lokacin da yake kan ganiyarsa. Ya bayyana irin nasarorin da ya samu a lokacin, inda ya taimaki mutane da dama.

Sai dai a yanzu, Mai Dawayya ya bayyana cewa Allah ya jarrabe shi da rashin arziki. Ya ce ko mota ko keke bai mallaka ba, amma yana godewa Allah kan abin da yake ba shi.

A kwanakin baya, mawakin ya sake fitowa a wasu bukukuwan aure, inda ya yi waka tare da wasu fitattun mawaka kamar Ado Gwanja da Ali Jita.

4. Zainab Abdullahi Indomie: Jarumar Da Jita-Jita Ta Rufe Ta

Zainab Indomie ta kasance daya daga cikin fitattun jaruman Kannywood a lokacin da take kan ganiyarsu. Ta shiga harkar fim a shekarar 2008 da taimakon Adam A Zango, kuma ta samu lambar yabo a shekarar 2012.

Sai dai bayan shekaru, jarumar ta bace daga masana’antar, inda aka yi jita-jita cewa ta samu matsala a rayuwa ko kuma ta mutu. Daga baya ta ƙaryata wadannan jita-jita kuma ta sake komawa harkar fim a farkon shekarar 2024.

Labarin Sauran Jaruman Kannywood

Jarumar Kannywood, Nusaiba Muhammad Ibrahim wacce aka fi sani da Sailuba, ta bayyana cewa musuluntar wata ce ya ja hankalinta zuwa harkar fim. Ta ce ganin yadda wani fim ya sa wata ta karɓi Musulunci ne ya ƙarfafa niyyarta ta shiga harkar.

Sailuba ta bayyana cewa tana harkar fim kusan shekaru takwas yanzu, kuma tana fatan zama mai bayar da umarni nan gaba.

Full credit to the original publisher: Legit.ng – https://hausa.legit.ng/kannywood/1668341-fitattun-jaruman-kannywood-da-suka-yi-suna-amma-suka-zama-abin-tausayi-daga-baya/