Uban Amarya, Alhaji Yusuf Mato, Na Mika Sakon Godiya Zuwa Ga Bakin Da Suka Samu Halartar Daurin Auren ‘Yarsa a Abuja

Abuja, Najeriya – Uban amarya, Alhaji Yusuf Mato, ya bayyana godiya ta musamman ga dukkan manyan baki, dangi, abokai, da masoya da suka halarta ko suka turo da sakon fatan alheri a bikin daurin auren diyarsa, Gimbiya Firdausi Yusuf Mato, da angonta, Nazir Zubairu Baba, da aka gudanar a Masallacin Juma’a na Kasa da ke Abuja.

A cikin wata sanarwa da ya fitar a madadin iyalinsa, Alhaji Yusuf ya bayyana bikin a matsayin lokaci mai albarka da farin ciki wanda ya kara armashi sakamakon halartar manyan mutane daga bangarori daban-daban na rayuwa.

Ya nuna godiya ta musamman ga Mai Martaba Sarkin Dass, Alhaji Usman Bilyaminu Othman, wanda ya tsaya a matsayin Waliyyin amarya, kuma ya gabatar da jawabi mai cike da hikima da kira ga matasan Najeriya da su gina gidajen aurensu bisa amana, da’a, da hakuri.

“Muna matukar godiya da halartar Mai Martaba Sarkin Dass, wanda shawarwarinsa da addu’o’insa suka kara daraja da muhimmanci ga wannan lokaci na musamman,” in ji sanarwar.

Alhaji Yusuf ya kuma yi godiya ga Babban Limamin Masallacin Kasa, Farfesa Muhammad Adam Kabir, wanda ya jagoranci daurin aure tare da yin addu’a domin zaman lafiya da kwanciyar hankali a tsakanin ma’auratan da kuma a dukkan gidajen ‘yan Najeriya.

“Mun yaba da irin goyon baya da kauna da dangi, abokai da sauran masoya suka nuna, ko da ta hanyar halarta kai tsaye, ko ta sakon fatan alheri. Hakan ya kara mana karfin guiwa da jin dadi,” in ji shi.

Ya kuma jinjinawa dukkan wadanda suka taka rawa wajen shiryawa da gudanar da bikin, inda ya ce jajircewarsu ce ta tabbatar da nasarar da aka samu.

“Madadin iyalina, muna cewa mun gode matuka da duk wanda ya tsaya tare da mu a wannan rana ta tarihi. Muna rokon Allah Madaukakin Sarki da Ya saka da alheri, Ya kuma ba kowa damar murnar irin wannan bikin a gidajensu,” in ji Alhaji Yusuf.

A karshe, ya roki Allah da Ya ba Firdausi da Nazir zaman lafiya, soyayya, da zaman fahimta a tsakaninsu tare da albarkacin aure mai dorewa.