IBB Ya Tunatar Da Rayuwar Da Ya Yi Da Buhari A Cikin Sakon Ta’aziyya

Tsohon shugaban mulkin soja, Janar Ibrahim Badamasi Babangida (IBB), ya bayyana bakin ciki da kaduwa bisa rasuwar tsohon shugaban kasar, Muhammadu Buhari, wanda ya rasu a ranar Lahadi, 13 ga Yuli, 2025 a wani asibiti a London.

IBB Ya Bayyana Buhari A Matsayin Dan Kishin Kasa

A wata sanarwa da ya sanya hannu da kansa, IBB ya ce ya samu labarin mutuwar Buhari cikin tashin hankali. Ya bayyana marigayin a matsayin mutum mai kishin kasa, da tsantsar gaskiya da rikon amana.

“Tun daga shekarar 1962 da muka fara haduwa a makarantar horar da sojoji ta Kaduna, Buhari ya riga ya yi fice – mai hankali ne, mai jajircewa, mai tsari, mai tawali’u, kuma mai cikakken kishin kasa.”

Dangantakar IBB Da Buhari

Janar Babangida ya bayyana cewa dangantakarsa da Buhari ta kai matakin da suka daina ganin kansu a matsayin abokan aiki kawai, har suka dinga mu’amala da juna a matsayin ‘yan uwa.

Ya kara da cewa ko da yake sukan samu sabani a wasu lamura, hakan bai taba hana shi ganin Buhari a matsayin jajirtaccen dan kasa ba.

Buhari Ya Tsaya Tsayin Daka Kan Gaskiya

IBB ya kara bayyana cewa Buhari ya nuna gaskiya da rikon amana har zuwa karshen rayuwarsa, yana mai cewa a matsayinsa na shugaban kasa da kuma tsohon shugaban soja.

“A kowane matsayi da ya rike, Buhari ya kasance mutum mai kishin kasa. Ko da kuwa wasu basu fahimce shi ba, amma ya tsaya a kan akidarsa. Shi mutum ne mai tsoron Allah, wanda bai taba barin girman matsayinsa ya rinjayi halayensa ba.”

Sakon Ta’aziyya Ga Iyalan Buhari

Janar Babangida ya mika ta’aziyya ga matar Buhari, Aisha Buhari, da ‘ya’yansa da jikokinsa, da kuma daukacin al’ummar Najeriya.

“Allah ya gafarta masa, ya karɓi ayyukansa na alheri, ya kuma sanya shi cikin Aljannatul Firdaus.”

Tarihin Shigar Buhari Aikin Soja

A wani rahoto na baya-bayan nan, an bayyana cewa shugaba Muhammadu Buhari ya fadi dalilin shigar shi aikin soja kafin rasuwarsa.

Marigayin ya bayyana cewa ya gudu daga gida ne a 1962 ya shiga aikin soja saboda za a masa aure, wanda ya nuna cewa tun farkon rayuwarsa ya nuna halin jajircewa da kuma son cin gashin kansa.

Rashin Buhari Ga Al’ummar Najeriya

IBB ya kara da cewa mutuwar Buhari ba kawai mutuwar tsohon shugaban kasa ba ce, sai dai rashi ne ga Najeriya baki daya, saboda gudunmawar da ya bayar ga kasa a matsayin soja da kuma shugaban kasa.

Ya ce ko da yake wasu na iya ganin ra’ayoyinsa na siyasa, amma babu shakka cewa Buhari ya kasance mutum ne mai kishin kasa da kuma son kare haƙƙin al’umma.

Asali: Legit.ng