Sojojin Najeriya Sun Dakile Shirin ‘Yan Ta’adda na Tona Bama-Bamai Sama da 50 a Gada
Maiduguri – Dakarun rundunar sojin Najeriya da ke aiki a karkashin Operation Hadin Kai tare da hadin gwiwar jami’an Civilian Joint Task Force (CJTF) sun samu nasarar dakile wani babban shirin ‘yan ta’adda na kai hari a jihar Borno.
Gano Bama-Bamai 56 a Gada
A cewar wata sanarwa da rundunar sojin kasar ta fitar a shafinta na X (Twitter), sojojin sun gano tare da kwance bama-bamai 56 da aka binne a gadar da ke kan hanyar Marte zuwa Dikwa.
Sanarwar ta bayyana cewa ana kyautata zaton ‘yan ta’addan Boko Haram ko kuma ISWAP ne suka dasa wadannan abubuwan fashewa domin kai hare-hare kan fararen hula da jami’an tsaro.
“Ya zuwa yanzu, an samu nasarar ganowa tare da kwance bama-bamai 56 da aka binne su a wurin.”
“Ana ci gaba da bincike ta hanyar amfani da fasaha domin gano sauran wadanda aka binne da kuma kwance su gaba daya domin tabbatar da tsaron yankin,” in ji sanarwar.
Nasara Mai Girma a Yakin Da Ta’addanci
Rundunar sojin ta kara da cewa wannan nasara ta dakile yiwuwar faruwar mummunan hare-haren da zai iya kashe mutane da yawa da lalata dukiyoyi.
Ta jaddada cewa hakan na nuna irin gogewa, shiri, da jajircewar da sojojin Najeriya ke yi wajen kare muhimman ababen more rayuwa da rayukan jama’a a yankin Arewa maso Gabas.
Canjin Dabarun ‘Yan Ta’adda
Saboda matsin lamba daga hare-haren soji, ‘yan Boko Haram sun koma amfani da dabarar yakin sari-ka-noke, inda suke kai farmaki ba-zata da kuma amfani da bama-bamai a kan fararen hula da jami’an tsaro.
Rahotanni sun nuna cewa akalla mutane 34 ne suka mutu sakamakon bama-bamai da ‘yan ta’adda suka dasa tun farkon shekarar nan a jihar Borno.
Karin Tasiri a Yankin
An bayyana cewa yankin da aka gano wadannan bama-bamai na daga cikin wuraren da ‘yan ISWAP suka kai hari a kwanakin baya, wanda ke nuna cewa sojojin sun yi nasarar hana wani babban hari.
A wani labari na daban, jiragen rundunar sojin sama sun yi wa ‘yan bindiga luguden wuta bayan kisan sojoji akalla 17 a jihar Neja, wanda ke nuna ci gaba da matakan tsaro a yankin.
Kira Ga Jama’a
Sojojin sun yi kira ga jama’a da su ba da rahoton duk wani abu da za su iya ganin shi a matsayin mai hadari ga tsaron kasa, tare da yin alkawarin ci gaba da kare jama’a daga barazanar ‘yan ta’adda.
Wannan nasara ta zo ne a lokacin da gwamnatin tarayya ke kokarin kawar da ta’addanci a yankin Arewa maso Gabas, inda aka samu raguwar hare-haren ‘yan ta’adda a wasu sassa.
Asali: Legit.ng