Farfesa Nasir Hassan-Wagini, malami a Sashen Ilimin Rayuwa da Tsire-tsire na Jami’ar Umaru Musa Yar’adua (UMYU) Katsina, ya yi kira ga matasa da dalibai da su rungumi sana’o’in hannu da kananan kasuwanci domin dogaro da kai maimakon zaman jiran aikin ofis wanda ke wahalar samu a yanzu.

Hassan-Wagini ya bayyana hakan ne a wata hira da Kamfanin Dillancin Labarai na Najeriya (NAN) da aka gudanar da shi a cikin kasuwar mako-mako ta Batsari da ke jihar Katsina, inda ya ke sayar da kayan lambu da sauran amfanin gona.

“Dogaro da Kai Ne Mafita Ga Matasa”

Farfesan wanda ya fito daga gida mai tarihi a harkar noma ya ce bai manta asalinsa ba, domin shi kansa ya taso a gonaki, kuma har yanzu yana ci gaba da gudanar da kananan sana’o’i duk da mukamin sa na Farfesa a jami’a.

A cewarsa:

“Manomi ne ya haife ni, kuma na taso a matsayin manomi. Duk da ilimi da matsayi, ina ci gaba da gudanar da harkokin kasuwanci na kamar kowa. Wannan shi ne abin da nake so matasa su fahimta.”

Ya bukaci matasa da suka kammala karatu irin su NCE, Difloma, ko Digiri da kada su tsaya jiran aikin gwamnati ko na ofis, su nemi sana’o’in da za su iya farawa da hannunsu don dogaro da kai.

Kar Ka Ji Kunyar Sana’a – Farfesa Ya Fada

Hassan-Wagini ya jaddada cewa ba laifi ba ne ko rashin daraja mutum ya shiga sana’a ko kasuwanci, yana mai cewa:

“Matasa da dama suna jin kunya su shiga sana’o’in hannu, suna ganin kamar yana rage musu kima. Amma da gaske abin da ya fi muhimmanci shi ne yadda mutum ke taimakon kansa da al’umma.”

Ya kara da cewa lokaci ya yi da matasa za su koma gona, su zuba jari a kananan sana’o’i, su sarrafa albarkatun kasa, domin a haka za su kara samun kwarewa da kuma samun kudin shiga.

Shaidar Al’umma Kan Hali Nagari na Farfesan

Wani daga cikin makwabta a kasuwar, Malam Uzairu, ya bayyana Farfesan a matsayin mutum mai saukin kai, tawali’u, da kuma mutunci wajen hulɗa da jama’a. Ya ce:

“Ko da yake Farfesa ne, amma yana zaune da mu kamar kowa. Babu girman kai, muna girmama shi saboda halinsa na mutunci da gaskiya.”

Farashin Kayan Lambu a Kasuwa

A cewar rahoton NAN, farashin kayan lambu a kasuwar Batsari ya yi tashin gwauron zabo, musamman ganin yadda bukatar kayayyaki ke ƙaruwa. Ga jerin farashin wasu daga cikin kayan:

• Buhun Albasa mai nauyin kilo 100 – N65,000 zuwa sama
• Buhun busasshen barkono kilo 100 – N115,000 zuwa sama
• Buhun busasshen tumatir kilo 100 – N60,000 zuwa sama
• Buhun barkono mai zafi kilo 50 – N100,000 zuwa sama

An bayyana cewa cikin ‘yan watanni masu zuwa, manoma za su fara girbin sabbin tumatir, barkono, da albasa, wanda zai taimaka rage tsadar kayayyaki a kasuwanni.

Tsaro Ya Inganta a Batsari

NAN ta kuma tabbatar da cewa tsaro ya kara inganta a yankin Batsari, wanda hakan ke kara bai wa manoma, ‘yan kasuwa da al’umma dama su gudanar da harkokin su cikin kwanciyar hankali.

Hassan-Wagini ya bayyana cewa haɗa ilimi da kwarewa wajen sana’a shi ne mabuɗin samun ci gaba na kashin kai da rage zaman banza a tsakanin matasa. Ya ce:

“Kar ku jira gwamnati kawai, ku je gona, ku sarrafa albarkatu, ku yi kasuwanci. Wannan shi ne mafita ga rashin aikin yi a kasar nan.”