Abuja, Najeriya – Fadar shugaban șasa ta bayyana cewa Bola Ahmed Tinubu ba zai bayyana sunan wanda zai kasance mataimakinsa a zaben 2027 ba sai bayan kammala taron jam’iyyar APC na shekarar 2026, kamar yadda tsarin mulki ya tanada. Wannan jawabi na zuwa ne a daidai lokacin da ake yawan rade-radi da jita-jita dangane da matsayin Sanata Kashim Shettima a gwamnatinsa mai ci.

Tsarin Siyasa da Mulki

Mai ba shugaban șasa shawara kan harkokin yada labarai, Bayo Onanuga, ya bayyana cewa babu wani abu da ya saba wa doka game da tsaida sunan mataimaki bayan tabbatar da dan takara daga jam’iyya. Ya ce wannan tsari ne na doka da aka saba bi, kuma shi ma tsohon shugaban kasa Muhammadu Buhari ya bi wannan hanya a shekarun baya. A cewarsa, ba za a shiga zabe da sunan mataimaki ba har sai an tantance dan takara daga jam’iyyar APC.

“A tsarin mulki na Najeriya, ana bukatar jam’iyya ta fara tsaida dan takara na shugaban kasa, sannan daga nan ne za a fitar da wanda zai rike matsayin mataimaki. Wannan shi ne tsarin da Buhari ya bi a 2014/2015, kuma Tinubu zai yi hakan ne bayan taron jam’iyyar APC da za a gudanar a shekarar 2026,” inji Onanuga.

Jita-jita Kan Shettima

Rahotanni da jita-jita sun rika yawo cewa akwai yiyuwar shugaban kasa Tinubu zai sauya mataimakinsa a zaben 2027, lamarin da ya haddasa cece-kuce a tsakanin ‘yan Najeriya. Wasu ma na cewa za a iya dauko wani dan siyasa daga kudu maso gabas ko arewa ta tsakiya domin hada karfi da karfe. Sai dai Onanuga ya bayyana wadannan jita-jita a matsayin karya da bashi da tushe balle makama.

“Wasu ma sun rika yayata cewa ɗan shugaban kasa Seyi Tinubu zai maye gurbin Shettima, wannan ba gaskiya ba ne. Bai kamata a dauki labaran da ba su da tushe a matsayin gaskiya ba. Shettima har yanzu mataimaki ne kuma yana aiki tare da shugaban kasa cikin natsuwa da jituwa,” inji shi.

Wannan Ba Sabon Abu Ba Ne

A tarihin siyasar Najeriya, sauya mataimaki ba sabon abu ba ne. A lokacin da Tinubu ke gwamnan Legas daga 1999 zuwa 2007, ya sauya mataimakinsa sau biyu domin dacewa da tsarin siyasa da abubuwan da suka taso a lokacin. Wannan yana nuna cewa shugaban na iya yin hakan idan akwai bukata ko kuma ya ga hakan zai kara karfi ko fahimta a jam’iyyar da zai wakilta.

APC Na Shirin Babban Taro

Jam’iyyar APC ta bayyana cewa tana shirin gudanar da babban taron jam’iyya na kasa a shekarar 2026, wanda zai hada da tsaida dan takara na shugaban kasa da kuma zabar sauran shugabanni. Wannan taron na da matukar muhimmanci domin yana bayyani ne ga yadda jam’iyyar ke fatan tafiya zuwa zaben 2027. Idan Tinubu ya samu amincewa daga jam’iyya, zai fitar da sunan wanda zai zama mataimakinsa.

Masu sharhi na siyasa sun bayyana cewa wannan tsari yana da muhimmanci domin yana hana rikici a cikin jam’iyya. Ana fatan cewa za a bi tsarin da ya dace, kuma za a zabi mataimaki da zai dace da burin ci gaban Najeriya da al’ummar ta gaba daya.

Ra’ayin Jama’a

Jama’a sun bayyana ra’ayoyinsu dangane da wannan batu a kafafen sada zumunta. Wasu na ganin Shettima ya kamata ya cigaba da zama mataimakin shugaban kasa idan Tinubu zai sake tsayawa takara. Wasu kuma na ganin akwai bukatar sabunta tsarin shugabanci da kawo sabbin fuska masu ilimi da nagarta daga yankuna daban-daban na kasar nan domin bunkasa hadin kai da zaman lafiya.